Kreu demokrat, Lulzim Basha ka zhvilluar sot ditën e dytë të vizitës së tij në Kosovë.
Në një takim me kreun e komunës së Prishtinës, Shpend Ahmeti, Basha u ndal tek akuzat ndaj presidentit Thaçi duke theksuar se drejtësia ndërkombëtare duhet vendosë barazpeshë sa i përket krimeve të luftës së Kosovës.
“Askush nuk mund ta njollosë luftën e bijëve dhe bijave të Kosovës, që ishte një luftë kundër një agresioni, një spastrimi etnik. Kam vlerësuar qëndrimet e Thacit dhe Veselit që kanë konfimuar gatishmërinë për tu përballur me drejtësinë, si një traditë e shpallur tashmë nga të gjithë drejtuesit e UÇK-së. Drejtësia nuk mund të ketë dy kute. Boll më me një peshore që anon nga ana e mbrojtësve të viktimës, ndërkohë që krimet çnjerëzore ndaj popullit të Kosovës, mbeten pa autorë, pa autorë sa i takon ekzekutorëve, pa autor sa i takon urdhëruesve, pa autor sa i përket përgjegjësve politik. Shpresoj që drejtësia ndërkombëtare do të vendos në barazpeshë peshoren duke trajtuar me rigorozitet çdo pretendim për krime lufte edhe ndaj atyre qe kryen agresionin dhe spastrimin etink.”, tha Basha.
Në fjalën e tij, kryedemokrati e vuri gjithashtu theksin tek një kohezion real i forcave politike.
“Angazhimi i parë që kam marrë gjatë kësaj vizite në Prishtinë është që bashkërendimi mes Tiranës e Prishtinës të jetë i plotë e i sinqertë e në funksion e në mbështetje të institucioneve e forcave politike të Kosovës. Ky është shërbimi më i mirë që mund të bëjë Tirana larg protagonizmit të pavend dhe larg iniciativave të pakonsultuara që kanë sjellë dëme të cilat duhet të rikuperohen vetëm përmes një përqasje të tillë si ajo që siguroi shpalljen e pavarësisë dhe njohjen e Kosovës masivisht nga komuniteti ndërkombëtar e përparimi i Kosovës euroatlantik. Është një rrugë e gjatë dhe e vështirë por sic e dimë dhe ne në Shqipëri është plotësisht e mundur. Megjithatë në sfidat që po kalojmë theksoj se me kryetarin e komunës së Prishtinës, ka një përvojë të cmuar e të gjatë politike kombëtare e ndërkombëtar. Ka rëndësi një kohezion real i forcave politike, se demokracia ka minorancë e mazhorancë por edhe qëllime të përbashkëta shtetërore sic janë ato që po imponojnë zhvillimet e fundit në Kosovë e që kërkojnë me të vërtetë një gjuhë objektiva të përbashkët. Hapësira institucionale që po krijohet shpresoj se do shërbejë për një forcim të bashkëpunimit mes forcave politike.”, deklaroi ai. /Opinion.al
