Kreu i Partisë Demokratike, Lulzim Basha në një prononcim për mediat ka folur edhe për aferën e Inceneratorëve, i cili u shpreh se disa deputetë të PS kanë dërguar dokumente në Komisionin Hetimor të Inceneratorëve.
Kreu i PD nuk përmendi emra, teksa u pyet nga gazetarët se për cilët bëhej fjalë.
“Një raport do të dëshmohet se ka një fije ndërgjegje mes atyre deputetëve socialistë, apo dhe ata që i kanë kërkuar votën dhe i kanë ftuar në kafe. Këto para nuk do i gëzojnë në çfarëdo lloj parajse fiskale të kenë shkuar. Ne ato para do ua kthejmë shqiptarëve, pensionistëve, fëmijëve shqiptarë. Janë marrë nga xhepat tuaj. Për fat të keq natyra konfliktuale në këto vite, na ka bërë të kuptojmë se asnjë prej tyre nuk do e miratojë raportin. Edhe mund të ndodh. Ne nuk po iu kërkojmë që të rreshtohen me PD, por të votojnë për t’iu kthyer shqiptarëve hakun, bukën e gojës. Me këtë votë ata do të tregojnë se nuk janë pjesë të kësaj afere i prindër, apo bijë nënash dhe baballarësh që jetojnë me pensionet mizerabël, që ka një përgjegjësi që shkon përtej të qënit demokrat apo socialist. Ky është testi i parë, që vjen të enjten e ardhshme. A do të ketë ndonjë socialist guximin që ta tregojë me votë, siç e thotë ndër dhembë apo siç na e thotë dhe neve se; kjo është një vjedhje e madhe”,-tha Basha.
Pyetje: Socialistët e kanë bërë?
Basha: Po po edhe socialistët e kanë bërë.
Pyetje: Cilët janë këta?
“Ju i thoni burimet? Dua ti shpreh mirënjohjen çdo socialisti e socialisteje që e ka bërë këtë, mund të mos jemi dakord për mijëra gjëra, mundem për disa prej tyre të kem si kryetari PD disa çështje fondamentale që na ndajnë përjetë se kanë të bëjnë me pikëpamjet tona për mëkatet por për këtë aspekt pavarësisht cili ka qenë motivi, por shpresoj që motivi të jetë ky që jemi njerëz në radhë të parë para se te jemi politikane e deputete, e ta kuptojmë çfarë i kemi bërë këtij vendi, t’i marrësh 430 milionë euro përmes një anëtari të bandës së Lushnjes”,-tha Basha.
