Kreu i Partisë Demokratike, Lulzim Basha të martën deklaroi se ky vit ka qenë i tmerrshëm dhe gjithçka ka rënë mbi qytetarët, pasi parat e drogës po blejnë bizneset e ndershme, të cilat mbyllen dhe po komandojnë ekonominë.
“Biznesi ka një krizë të vërtetë mes ofertës dhe kërkesës. Mjekët po largohen masivisht nga Shqipëria, sipërmarrja po largohet nga vendi, po largohen intelektualët, të rinjtë e sapodiplomuar, ky është një tmerr i vërtetë”, tha Basha.
Kreu demokrat tha se qëndresa e opozitës këtë vit tregon se nuk ka pasur opozitë më kurajoze që ka denoncuar dhe i ka qëndruar deri në fund denoncimeve për drogën, të inkriminuarve në Kuvend apo në krye të bashkive të vendit.
“Demokracia është viktimizuar, ky nuk është më një konstatim i opozitës por edhe i ndërkombëtarëve. Kemi një krizë politike dhe kjo qeverisje është politikisht e vdekur. Kemi një kryeministër të vdekur politikisht i kapur nga zullumet e tij. Edhe kapja e kryeprokurorit është pjesë e zullumit. E keqja sot ka akaparuar institucionet e vendit, por edhe zgjedhjet”, tha Basha.
