Opozita e bashkuar me në krye Partinë Demokratike ka caktuar datën 8 korrik për të mbajtur protestën e radhës kundër Qeverisë, e para që prej mbajtjes së zgjedhjeve të 30 qershorit.
Pas vendimit të marrë një ditë më parë, kreu i PD, Lulzim Basha, thërriti këtë mëngjes në mbledhje kryesinë e partisë si dhe grupim parlamentar të përbërë nga deputetët që dhanë dorëheqjen nga mandatet e tyre.
Mësohet se Basha ka thënë: “Jemi në prag të finalizimit të aksionit tonë. Do të vijojmë të mbajmë komunikim me qytetarët dhe ndërkombëtarët. Shqiptarët e refuzuan Ramën. Nuk do të ketë pushime për ne, por as për kundërshtarin”.
“Rama edhe kur i bën i vetëm votimet dhe numërimin, edhe kur nuk ka kundërshtar për të vjedhur, vjedh dhe manipulon. Këtë e dëshmojnë qindra denoncime nga media dhe mijëra të tjera nga qytetaret si dhe gjetjet nga raporti paraprak i ODIHR, me i keqi që nga 97. Rama e beri për të rritur pjesëmarrjen fiktive. ODIHR vuri vulën për rolin kriminal të KQZ në këtë operacion të papare manipulimi. Me Edi Ramen nuk mund të ketë kurrë zgjedhje te lira”, mësohet të ketë thënë Basha./ Opinion.al
