Kreu i PD Lulzim Basha, të mërkurën, priti në një takim zv.Ndihmës Sekretaren e Shtetit, Elisabeth Millard.
Basha e njohu Millard me situatën që po kalon vendi ynë nga përkeqësimi i standardeve të demokracisë, deri tek kapja e shtetit nga krimi i organizuar në vend.
Zyra e shtypit në PD, sqaroi se kryedemokrati i tregoi znj.Millard nismën e opozitës për vettingun e politikës.
Një nismë që luan rol për pastrimin e Parlamentit, Qeverisë dhe institucioneve të tjera shtetërore nga politikanë të korruptuar dhe të lidhur me krimin.
Basha nënvizoi se ky është një proces pastrimi, që nuk pengon hetimet e drejtësisë për politikanët dhe zyrtarët e lartë.
“Në një vend ku krimi dikton vendimarrjen nuk mund të flitet për institucione të pavarura dhe standarde demokratike”.
Kreu i opozitës shprehu vendosmerinë për t’i shkuar deri në fund pastrimit të politikës nga krimi. Ai kërkoi edhe ndihmën e SHBA-së në këtë proces jetik për vendin dhe të ardhmen.
Basha shprehu mirënjohjen e tij për kontributin e jashtëzakonshëm të SHBA për paqen dhe stabilitetin në rajonin e Ballkanit.
Duke ndarë me zyrtaren e lartë amerikane vlerësimin e tij se roli dhe vëmendja e SHBA ndaj zhvillimeve në rajon është e një rëndësie përcaktuese për të ardhmen euro-atlantike dhe europiane të Ballkanit Perëndimor.
