Kreu i Partisë Demokratike, Lulzim Basha përsëriti edhe njehërë sot thirrjen për qeverinë që të zbatojë planin e tyre me 5 pika të rimëkëmbjes nga kriza e koronavirusit.
Gjatë një takimi me qytetarë në Elbasan, Basha tha për mediat se konsumi ka rënë dhe se xhepat e njerëzve janë bosh. Sipas tij kryeministri Rama duhet t’i lërë batutat por t’i japë përgjigje gjendjes ku ndodhen njerëzit.
Basha u pyet edhe në lidhje me ndryshimet e Kodit Zgjedhor por preferoi të mos komentonte lidhur me këtë temë.
”U futëm në biznese të ndryshme, dhe ishim në një nga rrugë kryesore të Elbasanit. Ka rënë gjysmë për gjysmë konsumi, njerëzit s’kanë të blejnë bukë. S’kanë lekë. Isha në farmaci, dhe më thanë që më kërkojnë 1 kokërr paracetamol. Hapet kutia dhe jepet një pjesë, pra një tabak i ilaçeve. Lista në farmaci vijon të rritet. E njëjta gjë në Durrës. Konsumi ka rënë pikiatë. Xhepat e njerëzve janë bosh. Është i vetmi vend që jo s’pati paketë të tretë e të katërt, por edhe paketat e para ishin gjysmake. 100 mijë njerëz të papunë Kush mendon për ta? Çfarë përgjigje ka Rama? Nga mëngjesi deri në darkë bën batuta pa kripë, po ato as nuk hahen as nuk pihen. Nuk kam ardhur për Kodin Zgjedhor këtu, kam ardhur të them se plani me pesë pika është zgjidhja për 6 muaj. Planin me pesë pika ta marri. E lus edhe sot nga Elbasani të lërë broçkullat dhe gërvërret. I themi merreni këtë plan dhe zbatojeni. Nuk është për konkurrencë politike. Do ketë kohë për përgjegjësitë. Planin e kemi bërë bashkë me ekspertët për ta zbatuar qeveria. Plani është i zbatueshëm. Mund të mos bëjnë mrekulli por një far lehtësimi mund ta japin. E gjithë kjo paketë ka për qëllim të ndalë rrokullisjen e ekonomisë drejt kolapsit. Ky plan me pesë pika të nisë të zbatohet një orë e më parë, për të ndihmuar afro një milion shqiptarë që për shkak të krizës rrezikojnë bukën e gojës”, theksoi Basha.
Kreu i demokratëve foli gjithashtu për situatën e kriminalitetit në Elbasan, ku muajt e fundit ka patur disa vrasje. Ai theksoi se kriminaliteti është rritur si pasojë e bashkëpunimit me pushtetin dhe nënvizoi se shkëputja e këtyre lidhjeve do të jetë një nga zotimet e tij të para në krye të qeverisë.
“Thirrja ime është të bashkohemi për të nisur së bashku një rrugë tjetër, për të ndryshuar menjëherë kurs, sepse kjo rrugë ka shkatërruar ekonominë dhe të ardhmen e shqiptarëve. Një rrugë tjetër është ajo që sjell shpresë për rininë. Situata e krimit në Elbasan është rënduar për shkak të bashkëpunimit me pushtetin. Nuk ka njeri në Elbasan që nuk e ka kuptuar këtë. Zgjidhja është shkëputja e krimit nga pushteti. Ky është një nga zotimet e mia të para”, tha Basha./Opinion.al
