Kreu i Partisë Demokratike, Lulzim Basha, të enjten në Kuvend ka numëruar një sërë akuzash për gjendjen e mjeruar në vend, si dhe heqjen e ndihmës ekonomike 20 mijë familjeve.
Basha bëri përgjegjës kryeministrin Rama dhe qeverinë, duke e konsideruar një bandë hajdutësh.
Më tej, ai iu drejtua me një thirrje të fortë gjithë shqiptarëve.
“Negociatat në rrezik prej krimit e korrupsionit, bashkohuni shqiptarë, opozitën e keni gjithmonë me vete. Bashkohuni ta çlirojmë vendin nga këta 50 banditë ne jemi shumica të marrim fatin tanë në duart tona”- tha Basha.
Basha kundërshtoi sot fort skemën e re të qeverisë lidhur me ndihmën ekonomike, pasi janë nxjerrë dhe lënë pa asnjë ndihmë ekonomike në mënyrë arbitrare mbi 20 mijë familje në gjithë Shqipërinë.
Sipas Bashës, kjo do përbënte një vepër penale dhe vetë kryeminsitri i vendit Edi Rama duhet të merrej si i pandehur.
“Kjo është vepër penale e shpërdorimit të detyrës. Po të kishim prokurori të pavarur do t’a merrte të pandehur vetë Edi Ramën se nuk ka krim më të madh se t’i heqësh bukën e gojës më të pamundurve”,- tha ai.
