Kryetari i Partisë Demokratike, Lulzim Basha, ishte pak minuta më parë në një takim me banorë të Valiasit në Tiranë.
Në fjalën e tij Basha u kërkoi të pranishmëve që të mos mungojnë në protestën e madhe që do të mbahet më datë 16 shkurt përballë kryeministrisë.
Basha tha po ashtu se këta banorë nuk duhet të harrojnë që Rama u premtoi 700 mijë euro për përmbytjet, për përballimin e emergjencës, dhe nuk u dha asnjë cent.
“E mbaj mend shumë mirë atë ditë kur reshjet arritën kulmin dhe kjo zonë u përmbyt e gjitha. Kam qenë tek shumë prej jush dhe kam parë me sytë e mi se si banesat kishin dalë tërësisht jashtë funksionit.
Asnjë zyrtar i shtetit, i qeverisjes qëndrore nuk shihej. Edhe kur i kërkonin në telefon në raste emergjence nuk dukeshin. Vetëm pas tre apo katër ditësh kur situata u qetësua, por gjendja vazhdonte të mbetej e mjerë, erdhi fantazma. Erdhi dhe lëshoi dy apo tre batuta e barcaleta, u rrahu krahun dy tre punëtorëve të bashkisë që po punonin, dhe i tha kryetarit, do të kesh fondin 700 mijë Euro që të përballosh emergjëncën. Natyrisht ishte një tjetër mashtrim. Asnjë kokërr leku nuk iu dha Bashkisë së Kamzës. Asnjë cent dëmshpërblim 700 familjeve të cilët u përmbytën për shkak jo vetëm të motit por paklujdesisë dhe neglizhencës së Edi Ramës”,- tha Basha.
Basha po ashtu hodhi një tjetër akuzë ndaj kryeministrit Rama, duke thënë se në bazë të një investigimi slloven, Rama shiti për një ditë energjinë e KESH për 4 milion euro.
“Mediat shqiptare dhe ndërkombëtare kanë zbuluar një aferë të Edi Ramës. Në një ditë kanë shitur energjinë e KESH është 4 milionë euro. Sipas investigimit slloven rezulton se ai me njerëzit e tij ka fituar 4 mln euro me ujin e KESH. Uji kthehet në mallkim për njerëzit e thjesht dhe pasuri për Edi Ramën.”, tha Basha, duke e cilësuar këtë fakt si hajdutëri të Ramës dhe njerëzve pranë tij. D.L
