Kryetari i opozitës Lulzim Basha, është takuar ditën e sotme me banorët në Shkozet të Durrësit, të cilët u prekën nga tërmeti tragjik i 26 nëntorit.
Basha shprehet se pas dy muajve, këta banorë ende nuk kanë marrë bonus qiraje apo vlerësim dhe faturën e dëmeve.
Ndërkohë, banorët shprehen të revoltuar se pallati i tyre është shumë i dëmtuar, por bashkia, pa bërë vlerësim me ekspertizë, u ka thënë të futen brenda.
Pas bashkëbisedimit më banorët, kryedemokrati tha se Qeveria “Rama” ka dështuar duke bërë vetëm propagandë.
“Nuk ka asnjë ndryshim, ka dy muaj. As vlerësim të dëmeve, dhe as faturën e dëmeve. Kemi vetëm llafe dhe vetëm propagandë. Jam shumë i shqetësuar, sepse kjo po fillon të futet në dismensionin e tretë të krizës. E para shëndeti i të sëmurëve, të moshuarve dhe të fëmijëve, e dyta gjendja e biznesi për të cilën dua të njihem realisht se çfarë po ndodh dhe impaktin që ka në ekonominë e Durrësit dhe e treta, ndërkohë që fillon viti buxhetor, lëvrohen 150 milionë dolarë për oligarkët, ndërsa për njerëzit presin konferencën e donatorëve për të dhënë bonuset e qerasë dhe për të dëmshpërblyer shtëpitë”, tha Basha./ Opinion.al
