Kryetari i Partisë Demokratike, Lulzim Basha në vijim të takimeve në qytete të ndryshme ishte në Rrëshen, ku ju bëri thirrje qytetarëve që t’i bashkohen protestës së 16 shkurtit në Tiranë.
Kreu i opozitës bëri thirrje për t’i dhënë fund grushtit të shtetit nga kriminelët, të cilët sipas tij ka marrë peng shtetin dhe institucionet.
“Zgjedhjet janë asgjësuar, një gjë nuk e ka kuptuar Edi Rama. Kujtojani në 16 shkurt se zot i vendit, pronar i institucioneve nuk mund të jetë kurrë një njeri. Sovrani i institucioneve është populli, janë qytetarët. Ndaj ju ftoj qytetarë dhe qytetare, të gjithë së bashku më 16 shkurt t’i japim fund këtij grushti shteti nga kriminelët që e kanë marrë shtetin dhe institucionet peng”,- tha Basha.
Gjithashtu ai siguroi qytetarët se një qeveri tranzitore do të garantojë zgjedhje të lira e të ndershme.
“Ju garantoj zgjedhje të parakohshme me një qeveri tranzitore që do sigurojë zgjedhje të lira. Do keni një kryeministër që do ju shtrijë dorën, që do punojë për ju dhe do zgjidhë hallet tuaja “-tha ndër të tjera kreu i PD./E.M
