Kryetari i Partisë Demokratike, Lulzim Basha, sot, ka marrë pjesë në takimin e Asamblesë Politike të Partive Popullore Europiane në Bruksel.
Nga takimi, kreu i PD-së, Basha i ka bërë thirrje ndërkombëtarëve që të mbështesin fitoren e demokratëve në zgjedhjet e përgjithshme parlamentare të 18 qershorit.
Nëpërmjet një shënimi në facebook, kreu i demokratëve theksoi se e veçanta e këtij takimi është bashkërëndimi i aktiviteteve politike gjatë këtij viti, i cili për disa nga partitë anëtare është vit elektoral, përfshi CDU-në e Merkelit, republikanët francezë dhe Partinë Demoktratike të Shqipërisë.
“Nga Uashigtoni sot udhëtova drejt Brukselit ku po marr pjesë në Asamblenë Politike të Partisë Popullore Europiane, familjes së partive të djathta europiane ku bën pjesë edhe Partia Demokratike. EPP, si partia më e madhe në Komisionin dhe Parlamentin Europian, luan një rol kyç në politikën e Bashkimit Europian.
Një nga qëllimet kryesore të takimit është bashkërendimi i aktiviteteve politike gjatë këtij viti, i cili për disa nga partitë anëtare është vit elektoral, përfshi CDU-në e Merkelit, republikanët francezë dhe, natyrisht, Partinë Demokratike të Shqipërisë. Familja jonë politike do të na ndihmojë dhe mbështesë fuqimisht për fitoren tonë në zgjedhjet e ardhshme.”, tha Basha.
