Kryetari i Partisë Demokratike Lulzim Basha ndodhet në Shkodër, ku kujtoi heronjtë që dhanë jetën për të rrëzuar diktaturën e Enver Hoxhës. Kryedemokrati është shprehur se para viteve ’90 ishte ideologjia staliniste ajo që “vriste” shqiptarët, ndërsa sot krimi e vesi janë në pushtet.
Kryedemokrati tha se krimet e komunizmit ende nuk janë ndëshkuar, ndërsa theksoi se Partia Demokratike është kundër tiranisë dhe krimit.
“Sulmet ndaj shkrimtarit Agron Tufa, Çelo Hoxhës janë triumfe të vesit mbi vlerën. Triumfi i vesit dhe krimit mbi vlerën vazhdon. Një nga arsyet pse kundërshtarët tanë nuk e mohojnë vesin dhe krimin është se ata nuk u dënuan, por u lartësuan. Këtu jemi në një vend me burra dhe gra dinjitoze, fëmijë që u poqën para kohe dhe sot i kemi me thinja kokë. Ne e lamë harresën dhe nuk i dhamë goditjen e merituar fatale diktaturës së përbindshme.
Përtej dëmshpërblimit për të përndjekurit, duhet që të jemi me zemër me ta. Përtej ndryshimit të ligjit, bëhet fjalë për dënimin e krimit në nivel kombëtar. Ne kemi bërë të mundur që disa vende të kthehen në zona të frekuentuara nga njerëzit. Historia na tregon se krimi e vesi për 50 vjet qëndruan në pushtet. Përsëri modeli është i njëjtë. Sot përpos vesit të komunizmit, të marksizëm-leninizmit e stalinizmit, kemi vesin e krimit në pushtet. Sot në pushtet janë hipokritët, ata që zvarritën pas pushtetit. Shqiptarët duhet të besojnë në Zot, në atdhe, në votën e lirë dhe të ndershme.
Në respekt të atyre që përjetojnë dramat e jetës, me respektin më të madh të viktimave të kësaj dhune. Ata janë heronj, janë martirë, pa të cilët kombi nuk mund të ketë fibrën e kujtesës, të qëndresës dhe ringritjes, siç qëndroi kur rrëzuam diktaturën më 1990. Nuk ka fitore të vlerave pa sfidë. Diktatura i donte të harruar, mirëpo nuk ia doli dot. Ne jemi këtu për të mbrojtur tiraninë, lirinë që është pushtuar nga vesi e krimi”, tha Basha./ Opinion.al E.Xh.
