Kryetari i Partisë Demokratike Lulzim Basha këtë të dielë po zhvillon një takim elektoral me gratë në Burrel, ku po njihet nga afër me problemet që ato përballen në qytetin e tyre.
Gjatë fjalës së tij Basha tha se për 8 vite gratë janë keqpërdorur si makijazh nga Rama, duke thënë fjalë të bukura në publik, por që realiteti është krejtësisht ndryshe.
Më tej kryedemokrati prezantoi planin e PD në qendër të të cilit sipas Bashës është familja. Po ashtu ai premtoi barazinë gjinore, duke filluar nga pagat e barabarta.
“Dështimi më i madh është ekonomia. Rinia dhe gruaja janë të dënuara nga papunësia. Rreth 80% e grave në qarkun e Dibrës janë papunë. Ne do të mundësojmë që përmes shtytjes pozitive të trajnojmë gratë shqiptare për t’i përgatitur për tregun e punës. Investimet kërkojnë krah të kualifikuar pune në çdo nivel. Me planin tonë do të përfitojë rinia, gruaja, të reja. Shkruhet se gratë duhet të kenë pagë të barabartë me burrat, por në realitet nuk është këtu as në shtet as në privat.
Si mund të kemi fëmijë të shëndetshëm nëse nuk garantojmë pagë të barabartë. Një nga shqetësimet kryesore është familja, fëmija. Ku është shteti në raport me familjen? Është zhdukur nga radari. Për ne familja është gurthemeli i shoqërisë. Ne do t’iu mundësojmë çifteve të reja të kenë mundësi të blejnë një banesë. Ne do të subvencionojmë për 5000 çifte të reja çdo vit interesat e kredisë. Nëse nuk e bëjmë këtë vendi do të tkurret. Shqiptarët po bëjnë më pak fëmijë”, tha Basha.
