Kryetari i Partisë Demokratike Lulzim Basha ka nxjerrë një urdhër për koordinimin e veprimtarisë politike të PD deri më 31 gusht 2019.
Ky urdhër ka ardhur pas konsultimeve që kreu i selisë blu pati me anëtarët e kryesisë dhe grupin e ish-deputetëve. Në bazë të tij përcaktohet aksioni opozitar dhe ristrukturimi i degëve të PD në gjithë vendin.
Gjithashtu me anë të këtij urdhri, Basha ka bërë ndryshime të koordinatorëve të partisë në degët e PD. Kështu, Gazment Bardhi është emëruar koordinator në Shkodër duke zëvendësuar Flamur Nokën. Ky i fundit është deleguar në Elbasan ku ka zëvendësuar Luciano Boçin. Enkeled Alibeaj është emëruar në Dibër ndërkohë që vendin e tij në Fier e ka marrë Arben Ibro.
Sa i përket Tiranës, sipas urdhrit të ri koordinatorë do të jenë Hekuran Hoxhalli, Albana Vokshi, Aldo Bumçi, Orjola Pampuri, Edmond Spaho, Oerd Bylykbashi dhe Edi Paloka. Në Durrës është emëruar Gent Strazimiri, në Korçë Sahit Dollapi dhe në Pogradec Endri Hasa. Ervin Salianji do të koordinojë aktivitetin e PD në Gjirokastër ndërsa në Vlorë do të jetë Ervin Minarolli. Koordinatori i Beratit është emëruar Taulant Zeneli në Lezhë Flamur Hoxha dhe në Kukës Kreshnik Çollaku.
Degëve i kërkohet gjithashtu të hartojnë një kalendar takimesh me qytetarët si dhe përfshirjen në kryesi të personaliteteve me eksperiencë politike por edhe promovimin e të rinjve dhe grave në funksione drejtuese.
Më herët Basha paralajmëroi se opozita nuk do të pushojë dhe do të vazhdojë aksionin opozitar përmes protestave dhe takimeve me qytetarët. /Opinion.al
