Kreu i PD-së, Lulzim Basha ka shkuar në terren për të vëzhguar dëmet të cilat u shkaktuan nga tërmeti i 26 nëntorit, i cili u mori jetën dhjetëra qytetarëve dhe plagosi qindra të tjerë.
Në një intervistë televizive, Basha është shprehur se situata është mjaftë e rëndë dhe se qytetarët duhet të kenë vëmendjen e institucioneve.
Po ashtu, krydemokrati ka theksuar që nuk duhen harruar edhe zonat e tjera të cilat kanë pësuar dëme nga tërmeti 6.4 ballë, si Kurbini, Kavaja dhe Shijaku.
Pjesë nga intervista:
Pyetje: Zoti Basha, si ju duket situata në Shijak?
Lulzim Basha. Situata duket e rëndë. Janë qindra banesa të shkatërruara, në veçanti, në atë që njihet si lagjja e Luginës, zona e Luginës, Shijakut. Siç patë edhe banesat e banorëve, janë komplet të shkatërruara, të pabanueshme. Është nata e katërt që flenë nëpër makina, një pjesë prej tyre janë zhvendosur tek kushërinjtë dhe një pjesë do të kalojnë natën në këtë kalçeto të mbuluar, që është kontributi vullnetar i pronarit të kësaj kalçetoje. Pak më përpara, vullnetarët tanë kanë sjellë disa ndihma, dyshekë dhe ushqime.
Banorët kërkojnë një vemendje më të madhe. Përveç inspektimit të parë ditën e martë, nuk ka patur asnjë kontakt tjetër. Ndonëse këto banesa janë të rrethuara me shirit, pra që tregon se nuk mund të futen aktualisht, nuk ka një vendim të prerë dhe, mbi të gjitha, nuk ka një orientim se çfarë do të ndodhë me banorët. Prandaj, u premtova që do të jem zëri i tyre dhe më jepni mundësinë që, nëpërmjet televizionit tuaj, t’u bëj thirrje autoriteteve se edhe Shijaku është pjesë e Qarkut të Durrësit, pra është pjesë e gjendjes së emergjencës dhe këtu duhet të ketë një prani të shtuar dhe të organizuar të institucioneve për t’u ardhur në ndihmë këtyre njerëzve.
Edhe njëherë dua ta theksoj se janë me qindra familje jashtë banesave të tyre. Sonte është nata e katërt që ata nuk kanë ku të fusin kokën dhe sasia e ndihmave që ka mbërritur tek këta njerëz është shumë e vogël. Ka nevojë për ndihma materiale, ushqime, dysheqe, batanije, gjithçka, ndihmë të cilën njerëzit ta përdorin për të kaluar këto ditë të para, ndërkohë që do të bëhet vlerësimi përfundimtar se çfarë do të bëhet me shtëpitë e tyre.
Pyetje: Janë 18 pallate që konsiderohen të pabanueshme, kanë vënë shiritat, por nuk u kanë thënë se ku do të shkojnë. Kjo fushë kalçetoje është e pamjaftueshme dhe e ftohtë?
Lulzim Basha: Është absolutisht e pamjaftueshme. Problemi është se normalisht Durrësi dhe Thumana kanë marrë vëmendje, por nuk duhet të harrojmë që edhe zona të tjera të goditura duhet të kenë vëmendje po ashtu, Kurbini, Kavaja, Shijaku.Bëhet fjalë për qindra familje, mijëra qytetarë, të cilët kanë nevojë për ndihmë, por, aktualisht e gjejnë veten e tyre jashtë vëmendjes së autoriteteve, jashtë ndihmës, jashtë mundësive për ndihmë, me përjashtim të vullnetarëve që kanë kontribuar me ndihmat që kanë sjellë sot.
Pyetje: Ju keni takuar qytetarë në disa nga qytetet përreth Durrësit ndërkohë që kryeministri Rama deklaroi gjatë ditës së djeshme që nuk ka nevojë më për ndihma materiale, ushqime apo veshmbathje, si e keni parë situatën? Është e mjaftueshme ndihma që u është dhënë këtyre banorëve?
Lulzim Basha: E vetmja gjë që mund te them ështe se banorët thonë që nuk kemi mjaftueshëm ndihma. Madje keni qenë vetë dëshmitare ku nje pjesë prej tyre janë ankuar për diferencime. Një pjese prej tyre nuk ka marrë asnjë ndihmë dhe një pjesë e vogël ka marrë ndihma. Kjo është ajo që dëgjojmë dhe nuk besoj se kemi arsye ta vëmë në dyshim. Këta janë njerëz në nevojë, janë njerëz që kanë nevojë për ndihmë dhe do të përsëris thirrjen për këdo që të mundet duke përfshirë këtu ndihmat materiale./ Opinion.al
