Kreu i Partisë Demokratike, Lulzim Basha, pak minuta më parë, e ka quajtur mitingun e Partisë Socialiste në sheshin “Skënderbej” me të rinjtë që votojnë për herë të parë në zgjedhjet e qershorit, 2017 si një shpëlarje truri që po i bëhet atyre.
“Pak metra më tej, mjeranët e krimit kanë mbledhur një grup njerëzish të cilëve po mundohen t’i shpëlajnë trurin. Të rinjtë atje e dinë se njeriu që u flet për zhvillim është ai që shkatërroi ekonominë shqiptare, dhe që çoi 300 mijë shqiptarë në emigracion,” tha kreu i PD nga çadra e protestës.
Kryeopozitari vijoi me akuzat e tij të përhershme në këto 55 ditë proteste duke thënë se Rama po përdor krimin dhe kriminelët për të mbajtur pushtetin.
“Në 55 ditë Shqipëria është shpalosur si kurrë më parë në këto 27 vite pluralzimi e pacensuruar nga çirakët dhe kriminelët e saj, e pajoshur dhe e pajoshme nga të korruptuarit të saj. E tillë është fytyra e shpresës për të ardhmen. I tillë është gëzimi se një e nesërme më e mirë për të ardhmen po vjen. Pak metra më tej, mjeranët e krimit kanë mbledhur një grup njerëzit të cilëve po mundohen t’i shplajnë trurin. Të rinjtë atje e dinë se njeriu që u flet për zhvillim është ai që shkatërroi ekonominë shqiptare, dhe që çoi 300 mijë shqiptarë në emigracion. Ai ka mbyllur dyert e Eruopës, duke mbyllur dyert e drejtësisë, për faktin se është lidhur me krimin e kriminelët. Ne e dimë që nëse e lemë të keqen të vazhdojë, gjërat do të shkojnë zi e më zi. Njeriu që sot del para të rinjve dhe të rejave shqiptare, ka sjellë në parlament dhe në bashkitë e qyteteve, ata që kanë shitur gratë në rrugët e Europës. E ka lidhur fatin e tij me krimin që prej ditës së parë. Ku e gjen këtë lidhje të fortë me krimin, pse është kaq i lidhur me kriminelët. Përgjigja po vjen por fakti është se pa krimin Rama nuk ka as shumicën e votave, prandaj lidhet me krimin”, tha Basha.
