Kryeopozitari Lulzim Basha tha sot nga Fieri se nëse zgjidhet kryeministër, shpenzimet korruptive do tu vijë fundi dhe miliardat që i përpiu oligarkia në qeverinë Rama, do ti gëzojnë qytetarët.
Ai shigjetoi edhe kryeministrin Edi Rama, për të cilën tha se gënjeu qytetarët me premtimet e tij dhe se është njeriu që ka shkatërruar ekonominë.
“Edi Rama i shkeli premtimet, s’kishte qëllim ti mbante, ishte karremi për pushtetin. Katër vite timon i Ramës ishte shkatërrimi i ekonomisë…. Do ti japim fund shpenzime korruptove, fasadave, palmave, koncesioneve korruptive. Miliardat që i përpiu oligarkia dhe do ti gëzojnë fëmijët e Fierit, pensionistët e Fierit, njerëzit në nevojë, do ti kthejmë në subvencionet për fermerët”, tha Basha.
Ai prezantoi edhe njëherë çfarë përmban plani ekonomik i PD-së:
“Ne kemi objektiv ekonominë e fortë, uljen e taksave, të TVSH-së, financimet për fermerët e gjithë Shqipërisë, mbështetje për studentët, që kurrë më pamundësia ekonomike mos ti pengojë për mbaruar universitetin. 10 mijë studentë të kenë stazhe pune të paguara. Koha e cirkut estradës, do marrë fund njëherë e mirë me votën tuaj për numrin 6. Do vijë “Republika e Re” e taksave të ulëta, e modelit europian ku vogëlushët do gëzojnë shkolla me cilësi të lartë me drektë të paguar”.
Basha theksoi se ka vetëm një plan për ta nxjerrë ekonominë nga kriza ky është plani i Partisë Demokratike, “me vulat gjermane dhe me mbështetje amerikane”.
Kreu i PD-së shtoi se Rama, kur flitet për ekonominë, “belbëzon, i merret goja dhe gjunjët”.
“Flet për gjithçka veç ekonomisë, punësimit, kur vjen fjala te ekonomia i merret goja, s’flet dot”, theksoi Basha.
Ai foli edhe për Reformën në Drejtësi:
“Reformën në drejtësi se ndal dot më askush, institucionet e forta që ndihmojnë qytetarët e jo që i godasin do të jenë më të forta në ‘Republikën e Re’”.
