Kryetari i Partisë Demokratike Lulzim Basha ka dhënë një mesazh pas përfundimit të mbledhjes së Kuvendit Kombëtar.
Në një postim në rrjetin social “Facebook” ai shkruan se nga sot po nisin ndërtimin e Partisë Demokratike moderne dhe jo të partisë së kryetarit.
Ndër të tjera, ai shprehet se pa qëndresën e anëtarëve dhe drejtuesve nga seksioni e deri te kryesia e PD-së, nuk do të ishin sot duke ndërtuar të ardhmen.
“Pa qëndresën e anëtarëve dhe drejtuesve nga seksioni deri te kryesia e PD-së ne nuk do të ishim sot këtu për të ndërtuar të ardhmen, që t’ju shërbejmë njerëzve, që të hapen vende pune për të rinjtë tanë, që të rriten të ardhurat për familjet shqiptare, që ato të kenë arsim dhe shëndetësi më të mirë.
Për këtë nisim sot të ndërtojmë Partinë Demokratike moderne, partinë e qytetarëve dhe anëtarëve dhe jo partinë e kryetarit. Sepse kryetarët ikin e vijnë, por demokratët dhe Partia Demokratike do të jetë aty për të luftuar vetëm për të mirën e Shqipërisë dhe shqiptarëve! Mirënjohje për secilin prej tyre!” shkruan Basha në reagimin ne tij./Opinion.al
