Kryetari i Partisë Demokratike Lulzim Basha ka vijuar takimet në qytetin e Korçës. Sot ai ka qenë në një biznes fason, së bashku me ish-ministrin e Ekonomisë, Florion Mima. Basha përsëriti se do të ulë me 30 lekë çmimin e naftës, duke i dhënë më shumë frymëmarrje ekonomisë.
“Sot kemi shtetin që sillet me popullin dhe me shoqërinë njësoj si një prind i keq pijanec që pi alkool dhe nuk i çon bukë fëmijëve. Shqetësimi i parë nuk duhet të jetë sa taksa mbledh e si t’i vjedhë ato taksa. Shqetësimi i parë i qeverisë duhet të jetë sa vende pune të krijojë? Ulja e çmimit të naftës është e domosdoshme që t’iu mbajë juve në treg. Nëse të rritet kostoja e prodhimit dy rrugë ke ose të shkurtosh rrogat e tyre, ose të rrisësh çmimin. Po rrite çmimin del jashtë tregut, po dole jashtë tregut këto do rrinë jashtë pune. Gjërat janë të lidhura zinxhir. Nëna e gjithë kësaj të keqe është asgjësimi i votës së lirë. Nëse vjen qeveria jo me votën e qytetarët, por me votën e krimit nuk do t’ia dijë për qytetarët. Kjo duhet të marrë fund. Nuk shkohet kështu në Europë. Kush na thotë të kundërtën na gënjen, na mashtron, s’ka rëndësi në çfarë gjuhe na e thotë”, tha Basha.
Ndërkohë, Florion Mima foli për kursin e këmbimit, duke thënë se dobësimi i euros ka dëmtuar shumë biznese.
“Ju ndoshta nuk e perceptoni si ndikon kursi i këmbimit me jetët tuaja dhe pse do duhej që leku të forcohej. Leku duhet të ishte aq i dobët sa ç’ka qenë me euron. Çuditërisht brenda një vit Leku kërcen dhe forcohet. Kjo tregon që ka shumë euro në treg. Nga ka ardhur euro. Ka vetëm një prodhim. Nuk është nga mundi juaj. Është vetëm nga droga. Dëmi total i kursit të këmbimit ka qenë 400 milionë euro”, tha Mima./Opinion.al
