Kreu i PD Lulzim Basha këtë të mërkurë ka zhvilluar një takim me përfaqësues e drejtues të Urdhrit të Farmacistit dhe pacientë, me të cilët ndau programin e shpallur për shëndetësinë.
Teksa deklaroi se cilësia e barnave ka marrë një goditje gjatë këtyre viteve, Basha u sqaroi farmacistëve dhe pacientëve detajet e programit “Shqipëria Fiton”.
Kryedemokrati gjithashtu premtoi se angazhimi i parë i forcës politike që ai drejton do të jenë ndryshimet ligjore që barnat në Shqipëri të kenë cilësinë e vendeve europiane.
“Cilësia e barnave ka marrë një goditje të jashtëzakonshme gjatë këtyre viteve. Tregu është hapur për mafien e barnave e cila sjell barna të pa certifikuara jo në funksion të shëndetit të njerëzve por në funksion të mbushjes së xhepave të një grushti importuesish. Angazhimi i parë në këtë fushë është që ne do të bëjmë të gjitha ndryshimet e nevojshme ligjore dhe do të ushtrojmë të gjithë kontrollin e nevojshëm që barnat shqiptare të kenë cilësinë dhe standardet e vendeve europiane”, – tha Basha.
Basha deklaroi se në qendër të programit të PD do të jetë pacienti. Për kreun e PD, cilësia e barnave dhe trajtimi i pacientit janё dy ndryshimet kryesore qё do tё sjellё programi pёr shёndetёsinё.
“E dyta ka të bëjë me pacientin. Sepse i gjithë programi ynë për shëndetësinë ka në qendër pacientin, paraja ndjek pacientin. Kjo do të thotë që rimbursimi i barnave do të bëhet në bazë të diagnozës, në mënyrë që asnjë pacient që ka nevojë për një ilaç të veçantë, të mos mbetet pa e marrё kёtё mjekim”, – sqaroi Basha.
Më tej, gjatë takimit Basha sqaroi edhe çështjen e kartës së pacientit që do të ndryshojë mënyrën e përzgjedhjes së mjekut, spitalit apo edhe ilaçit që i duhet pacientit.
“Karta e pacientit do të mundësojë që pacienti të zgjedhë, te cili mjek familjeje do të shkojë, te cili specialist do të shkojë, te cili spital do të shkojë, dhe detyra e shtetit është të sigurojë që sistemi i sigurimeve shëndetësore të funksionojë dhe të marrin rimbursimin e duhur, ndërkohë që zgjedhjen e kanë ata në dorë”./Opinion.al
