“Të ngrihemi të gjithë bashkë në 18 shkurt për të thënë njëzëri se nuk mban më”. Kështu deklaroi sot Kryetari i Partisë Demokratike, Lulzim Basha teksa takoi banorët e Kamzës. Ai vizitoi disa familje në nevojë dhe tha se shumica e kësaj zone po kalon vështirësi të mëdha ekonomike.
Basha takoi familjen e Shyqyri Durishtit, i arrestuar nga policia pasi tentoi të sillte dritë në shtëpi për familjen e tij, të pallogaritur nga ndihma ekonomike shtetërore, pavarësisht gjendjes të banesës dhe kushteve të jetesës.
Kryedemokrati Basha, përpara mediave i bëri thirrje qytetarëve të ngrenë zërin për padrejtësitë dhe vështirësitë e jetës së përditshme. Basha u bëri thirrje qytetarëve t’i bashkohen më 18 shkurt.
“Të ngrihemi të gjithë bashkë në këtë lëvizje, të frymëzuar edhe nga zmbrapsja e qeverive të korruptuara në vendet europiane, e arritur vetëm përmes forcës së njerëzve dhe zërit të qytetarëve”, u shpreh ai.
Pas vizitës në shtëpinë e disa familjeve të pamundura ekonomikisht për të përballuar jetesën, kryetari demokrat Lulzim Basha ndaloi për të diskutuar me banorët mundësinë e një zgjidhje, që do të nisë më 18 shkurt për tu shtrirë më pas në gjithë Shqipërinë.
