Pas deklaratës së kompanisë Omnix se tërhiqej nga investimi prej 450 milionë dollarësh në zonën e Gjirit të Lalzit, për shkak të dhunës së ushtruar ndaj investitorit libanez, ka reaguar kryetari i Partisë Demokratike, Lulzim Basha.
Në një deklaratë për shtyp, kreu i opozitës tha se rreshtimi i Kryeministrit në krah të kriminelëve u bë shkak për largimin e kompanisë Omnix, të cilin e konsideroi një tjetër lajm të keq për vendin. Një lajm i keq, tha Basha, për mijëra familje që shpresonin se do të gjenin aty vende pune.
Sipas tij, largimi i kësaj kompanie nxit dhe përkeqëson klimën për investimet e huaja, që vazhdojnë të bien nga viti në vit.
“Por ky është një lajm i mirë për krimin, që ia doli të largojë një investitor të huaj. Krimi dhe trafikantët ia dolën ta mbajnë plaçkë të tyre zhvillimin e Shqipërisë. E vetmja alternativë e Edi Ramës është hashashi. Shqipëria e varfër, me drogë e në sundimin e kartelit të tij janë e vetmja mënyrë për të qëndruar në pushtet”, deklaroi më tej kreu i opozitës.
Lulzim Basha në emër të Partisë Demokratike i bëri thirrje kompanisë që të rishikojë vendimin e saj, pasi siç tha ai, Shqipëria ka nevojë për investime.
