Aksionin anti-informalitet, kreu i opozitës Lulzim Basha e ka cilësuar dhunë të gjobave dhe të sekuestrimeve ndaj sipërmarrjeve të vogla që sigurojnë mbijetesën e shumicës së familjeve shqiptare.
Në një reagim në rrjetet sociale, Basha shkruan se kryeministri Edi Rama pasi vodhi buxhetin e shtetit me kontrata dhe koncesione kriminale tani kërkon të vjedhë edhe pikën e fundit të mundit dhe gjakut të shqiptarëve.
Për Bashën, Rama nuk mund të jetë nismëtar i kërij aksioni pasi me lidhet e tij ka favorizuar klientët dhe oligarkët, ndërkohë që rëndon me taksa dhe tarifa sipërmarrjet e vogla dhe të mesme.
“Ndryshe nga Rama ne besojmë në një ekonomi të lirë dhe konkuruese. Vjet në shtator ne prezantuam paketën Antimafia. Në të identifikuam kush janë përfituesit dhe abuzuesit e mëdhenj të buxhetit të shtetit si dhe rrugët që ndjek qeveria për t’i favorizuar”, shkruan Basha.
“Ky është vetëm fillimi i zgjidhjes. Do të anullojmë të gjitha politikat fiskale që janë me emër biznesi, do të lehtësojmë barrën fiskale për gjithë sipërmarrjen. Mbi të gjitha do të marrim masa për të ndëshkuar mafian që fshihet pas oligarkisë. Me parimin “ndiq paranë” do të bëjmë të mundur që biznesi i ndershëm të punojë dhe të ndëshkohen abuzuesit!”, thekson më tej kreu i PD-së./ Opinion.al
