Kryetari i Partisë Demokratike, Lulzim Basha, pak minuta më parë, në një deklaratë për mediat ka folur për helmimin, ku pas mitingut hapës të fushatës elektorale për zgjedhjet e 25 qershorit, rreth 76 persona janë dërguar me urgjencë në orët e para të ditës në QSUT, me probleme në sy, lëkurë dhe në disa raste edhe frymëmarrje.
Para gazetarëve, Basha tha se kjo nuk është një tollumbace, por presim zbardhjen dhe vënien para drejtësisë autorin, kushdoqofshin ata.
“Efektet janë anësore dhe të përkohshme, ndërsa të gjithë janë të vendosur. Të gjithë e dimë se kjo nuk ishte tollumbace. Ndërsa presim zbardhjen dhe vënien para drejtësisë autorin, kushdoqofshin ata, po bëjmë edhe ne analizat tona. Kjo nuk ishte tollumbace. Por unë mund t’iu them se është detyra e autoriteteve shtetërore të vendosin para përgjegjësisë autorët, kushdoqofshin. Nëse kjo nuk ndodh, është një provë e gjunjëzimit total të shtetit. Ne po bëjmë analizën tonë, ne nuk do të ndalemi. Unë do të vazhdoj fushatën sonte në orën 19:00 në mitingun hapës në qytetin e Fierit. Asgjë nuk do të më ndalë mua dhe opozitën e bashkuar drejt fitores”, tha Basha.
