Pas mitingut në Tiranë mbrëmjen e të shtunës që çeli fushatën elektorale të PD për zgjedhjet e 25 qershorit, kreu i demokratëve Lulzim Basha u ndal sot në qytetin e Fierit, për të prezantuar kandidatët për deputetë dhe për të kërkuar votat e qytetarëve.
“Merrni Fierin në dorë, merrni Shqipërinë në dorë me votën tuaj në 25 qershor për Republikën e Re, Republikën tuaj”, iu drejtua simpatizantëve Basha.
“Ne jemi të bashkuar, ata janë të përçarë. Ne jemi të bashkuar jo vetëm brenda radhëve tona. Sot hedhim themelet e një politike për qytetarët. Politikanët e papërgjegjshëm me Ramën në krye shkatërruan besimin te politika si instrument ndryshimi. Unë e di se me gjithë përpjekjen time dhe punën time të madhe, e di se ka një mosbesim të madh te politika dhe politikanët se të tjera gjëra thonë dhe të tjera gjëra bëjnë kur futen në zyrat e pushtetit, se në fushatë flasin për popullin kurse në zyrat e shtetit e kanë mendjen te tenderat dhe pasurimi i xhepave të tyre. Kjo është totalisht e vërtetë, por kjo është ajo që ne do ndryshojmë dhe do përmbysim me votën tonë në 25 qershor”, tha ai.
Basha ftoi kundërshtarin e tij Edi Rama për debat në televizion.
“Sonte e ftoj këtu nga Fieri për një debat televiziv me kandidatin për Kryeministër të Republikës së Re. Edi Rama mund të shëtisësh në Shqipëri duke treguar barcaleta por nuk i çon dot katër javë me barcaleta. Eja në debat, bëj bilancin tënd! Unë bilancin tim! Ti programin tënd! Unë programin tim dhe qytetarët të vendosini me votën e tyre. Ftesën e bëra publike. Po s’e pate dëgjuar po ta nis edhe me shkrim“, tha lideri i opozitës.
