Kreu i PD-së, Lulzim Basha është i ftuar në emisionin “ Studio e Hapur” dhe gazetarja Eni Vasili e ka pyetur nëse ka paguar 20 mijë dollarë për foton me presidentin e SHBA, Donald Trump. Basha mohoi që të ketë paguar ndonjë qindarkë dhe foton e konsideroi të paçmueshme.
Kryedemokrati tha se foto e tij me Trump është në funksion të shqiptarëve dhe Shqipërisë.
“Unë kisha planifikuar takime të nivelit më të lartë të harkut kohor 17-18 maj dhe këto takime u shtynë. Kam zhvilluar takime me investitorë amerikanë, me bashkëpunëtorë të ngushtë të presidentit Trump. Foto me Trump është një mundësi e paprecedentë që mu ofrua mua dhe unë e vë në dispozicion të shqiptarëve dhe Shqipërisë. Kjo foto nuk ka kushtuar asnjë qindarkë dhe është e paçmueshme”, u shpreh Basha.
Basha komentoi edhe mbështetjen e presidentit të Turqisë, Rexhep Taip Erdogan, për kryeministrin Rama, duke e garantuar se në qeverisjen e PD-së investimet turke do të njohin rritje të jashtëzakonshme.
