“Partia ka disiplinë”, kështu deklaroi Lulzim Basha për ata që u përjashtuan nga PD, dhe që nuk pranuan të dorëzojnë mandatin.
Gjithashtu Basha nga studio e emisionit Zonë e Lirë foli dhe për ndërkombëtarët, teksa u pyet se kur do shpërthejë ndaj tyre.
“Po pse? Nuk e kanë fajin të huajt për këtë që po ndodh sot, e kemi ne. Ata thonë stabiliteti-stabiliteti-stabiliteti.
Tani kanë filluar të ndërgjegjësohen, se po të shikosh të gjitha mediat kryesore evropiane po thonë: protestat në Shqipëri janë kundër një qeverie që akuzohet për korrupsion, të lidhur me krimin dhe që ka kapur apo ka prishur zgjedhjet”, tha Basha.
Pjesë nga intervista
Çani: A do të digjen goma të tjera në protestën e radhës apo do dëgjohen porositë e ndërkombëtarëve?
Basha: Këto janë pyetje shumë të zgjuara që ti i kërkon të përgjigjem me një fjalë. Nuk jam aq i zgjuar sa të përgjigjem me një fjalë. Do vazhdojë të digjet frika dhe do të ndizet shpresa.
Çani: A do t’i përdorësh si gomë rezervë tenorët, sa herë që të ngjiret zëri në mitingje?
Basha: Jo. Por kur të mbarojë kjo betejë do të provoj se ajo që keni dëgjuar në publik nuk është zëri im më i mirë për të kënduar.
Çani: A do ta fshish me gomë Saimir Pirgun nga eventet e PD, pasi tha se i duhet të mbajë 200 koncerte nëpër botë që të rregullojë imazhin e gomës së djegur?
Basha: Jo. Por nëse vjen në Tiranë do ta ftoj për një kafe dhe do i them se imazhin nuk e nxijnë gomat por e nxijnë ato që shtypi ndërkombëtar tani i quan “shqipëria si Kolumbia”, “qeveria e kapur në vjedhje”… Kjo e nxin imazhin.
Çani: A do t’i fshish me gomë të gjithë tradhtarët e PD që pranuan mandatin?
Basha: Dy gjëra. Partia ka disiplinë. Kur merren vendime kolegjiale, ato vendime duhet të ndiqen. Nuk ka parti evropiane apo amerikane të funksionojë ndryshe. Ndërsa sa u përket personave ë kanë pranuar të futen aty, motivimi i tyre nuk është motiv i interesit publik. Ata nuk janë aty për t’i shërbyer demokracisë. Njerëzit e dinë fare mirë se për çfarë motivesh ata janë aty. Nuk kam ndërmend të merrem personalisht me asnjërin prej tyre.
Çani: A do t’u vësh flakën gomave të Sandër Lleshit, ministrit të Brendshëm, nëse përdor prapë gaz lotsjellës dhe që ngjiti snajperat tek minarja e xhamisë?
Basha: Sandër Lleshi nuk ka goma. Sandër Lleshi xhiron bosh. Sa më shpejt ta kuptojë, aq më mirë është për të.
Çani: Thonë që në 16 mars do të ketë trazira të rënda, të forta, është e vërtetë?
Basha: Dhuna i intereson vetëm Edi
Ramës. Hapja e panikut i intereson vetëm atij që është në panic, vetëm atij është në panic. Qytetarët bashkohen në protest, në rradhë të parë për të vrarë frikën, në rradhë të dytë për të ndarë shpresen e re që po lind./Opinion.al
