Kryetari i Partisë Demokratike, Lulzim Basha falenderoi nga Shkodra qytetarët që refuzuan të votojnë në 30 qershor dhe shtoi se “ata nuk do ta pranojnë uljen e kokës përpara këtij regjimi represiv”.
“Së pari dua të falënderoj të gjithë shkodranët që refuzuan masivisht Edi Ramën. Dua të falënderoj edhe socialistët e shkodranët që braktisëen kriminale të PS. Ata i çuan mesazhin kuptimplotë kupolës kriminale që ka kapur partinë e tyre” tha Basha.
Kreu i opozitës cilësoi se në Shkodër zgjedhjet u bojkotuan masivisht dhe se kjo gjë për Partinë Demokratike do të thotë përgjegjësi më e madhe. Ai theksoi se opozita do të luftojë për të arritur sjellë ndryshimin përmes veprave, ndër të cilat përmendi ndryshimet kushtetuese, zgjedhore dhe politike.
“Së dyti jam këtu për tu thënë shkodranëve se për mua dhe PD, refuzimi i Ramës dhe regjimit më 30 qershor është motiv im dhe përgjegjësi për ta kthyer këtë votë masive për largimin e regjimit antikombëtar, për ta kthyer në shpresë dhe në projekt ndryshimi që duhet të vijojë me vepra dhe garanci”, deklaroi ai.
“Nuk mjafton” tha Basha “të themi se kriza ekonomike është pasojë e qeverisjes së Edi Ramës por është koha të japim zgjidhjet tona për të rimëkëmbjen e saj”. /Opinion.al
