Në një konferencë për mediat, kreu i Partisë Demokratike, Lulzim Basha pranoi se edhe qeverisja e dikurshme e PD ka pasur korrupsion.
Nga selia blu, Basha u shpreh se do ta luftojë këtë çështje për të ecur përpara për tu shkëputur nga e kaluara dhe për të zgjedhur të ardhmen.
“E di që shpesh kjo retorikë mund të duket bajate, sepse edhe ish-qeverisja e PD ka patur pjesën e saj në këtë plagë të madhe për gjithë shoqërinë!!! Por ne jemi të vendosur ta luftojmë edhe atë të ecim përpara, të shkëputemi nga e kaluara jonë e keqe, dhe te zgjedhim të ardhmen që vetëm ne mund ta sjellim për shqiptarët!”, tha Basha.
Basha gjithashtu u shpreh se PD e mbështet drejtësinë në të gjitha veprimet e saj kundër korrupsionit. “Unë dhe PD përshëndesim të gjithë ata prokurorë dhe hetues të sistemit të ri të drejtësisë që kanë filluar të godasin korrupsionin në nivelet më të lartë me gjithë presionin e madh të përditshëm! Ashtu siç kemi bërë dhe do vazhdojmë të bëjmë detyrën tonë me denoncimet për korrupsionin galopant të qeverisë Rama, qeveria me e korruptuar ne Europe, sipas të gjitha raporteve ndërkombëtare, ashtu ne do te përkrahim dhe përshëndesim me forcë të gjitha goditjet që drejtësia bën kundër armikut të mirëqenies së shqiptarëve”, tha Basha./Opinion.al
