Shtatë minatorë kanë vdekur gjatë muajve të fundit në minierën e Bulqizës, ndërsa aksidenti i fundit ndodhi dje me dy të plagosur. Gjendja është alarmante ku mungojnë kushtet e sigurisë, tha lideri demokrat Lulzim Basha, ndërsa akuzoi ministrin Damian Gjiknuri se hesht për këtë situatë pasi është i paguar nga mafia e kromit. Ministri i Infrastrukturës, e theu heshtjen, por nuk foli për gjendjen në minierën e Bulqizës dhe arsyen e aksidenteve të shumta fatale. Ai iu përgjigj me akuza politike Lulzim Bashës duke thënë se “po paguajmë faturën e Babale partisë”. Sipas ministrit të Infrastrukturës dhe Industrisë, lejet minerare janë dhënë nga qeveria e mëparshme e Sali Berishës.
Më poshtë statusi i plotë i Damian Gjiknurit në facebook
Regjizori i Babales ju rikthye sot politikës së korbave duke përdorur politikisht fatkeqësitë njerëzore dhe aksidentet në punë gjatë aktivitetit minerar. Luli e di shumë mirë se ajo çka vazhdojmë ta paguajmë sot është fatura e “babale partisë” së tij dhe qeverisë në të cilën ishte pjesë, që parcelizuan në mënyrë kriminale çdo vendburim minerar duke u bërë shkak për rritjen e aksidenteve.
Në betejën tonë për zhbërjen e këtij parcelizimi kemi revokuar mbi 150 leje por jemi përballur e vazhdojmë të përballemi çdo ditë pa u ndalur me gjykatat e ndryshkura nga korrupsioni.
Regjizori i Babalës mbron gjykatat e korruptuara dhe këto të fundit mbrojnë e mbajnë në fuqi leje e licenca të firmosura nga skenaristi i Babales në të cilat ndodhin edhe aksidente me humbje jetësh njerëzore.
Një arsye më shumë për të mbështetur fuqimisht reformimin e sistemit të drejtësisë duke i vënë fre dhe spektaklit politik të Lulit në kërkim të kauzave të rradhës.
Lexo edhe/ Basha: Mafia e kromit ka blerë ministrin Gjiknuri
/Opinion.al
