Kreu i Partisë Demokratike Lulzim Basha theksoi në një deklaratë për median se zgjidhja e krizës mund të vijë vetëm përmes zgjedhjeve të lira dhe të ndershme dhe shtoi gjithashtu se në të njejtën ditë duhet të zhvillohen dy palë zgjedhje, ato parlamentare dhe lokale.
“Zgjidhja e kësaj krize kalon përmes zgjedhjeve të lira e të ndershme, një qeveri tranzitore pa Edi Ramën dhe zgjedhje të parakohshme parlamentare në të njëjtën ditë me zgjedhjet kushtetuese lokale. Opozita dhe PD janë të vendosura në qëllimin që i kanë vënë vetes që prej ditës së parë, për interes të qytetarëve dhe jo zgjidhje artificiale për karriget tona. Zgjidhja është krijimi i mekanizmave që asnjë qeveri e ardhshme të mos bjerë në të njëjtin batak” tha Basha.
Kreu i PD tha se 13 tetori është data e ligjshme e zgjedhjeve lokale dhe nënvizoi se KQZ tregoi që është e kapur nga Edi Rama pasi nuk u angazhua në organizimin e këtyre zgjedhjeve siç e kërkon kushtetuta.
“13 tetori është data kushtetuese e zgjedhjeve vendore e dekretuar nga presidenti. Ajo është një tregues i paligjshmërisë në të cilin është zhytur KQZ, që kishte për detyrë të organizonte zgjedhjet më 13 tetor. Ata kanë shkelur Kushtetutën dhe ligjin” deklaroi Basha.
Sa i përket çështjes së Agim Kajmakut, Basha dënoi heshtjen e Kryeministrit Rama, 24 orë pas publikimit të dokumenteve nga ana e PD duke pretenduar se kreu i Bashkisë Vorë ka probleme me drejtësinë greke.
“Dua gjithashtu të dënon heshtjen e Prokurorisë, që hesht për këtë çështje. Rekordet zyrtare që provojnë se Jorgo Kajmaku është person me llogari të hapura me drejtësinë greke janë publikuar. Heshtja e Edi Ramës dhe Prokurorisë tregojnë se Kajmaku u kandidua me bekimin e Edi Ramës”, u shpreh Basha. “Këta njerëz janë aty sepse mbrohen nga Edi Rama. /Opinion.al
