Menjëherë pas përfundimit të mbledhjes së grupit parlamentar të Partisë Demokratike, Lulzim Basha ka dalë në një konferencë për shtyp ku është shprehur se në kushtet e jashtëzakonshme të lidhjeve të shtetit me krimin, deputetët kanë vendosur të dorëzojnë mandatet e tyre.
“Duke mbështetur plotësisht zgjidhjen politike të ofruar nga opozita e bashkuar, të një qeverie tranzitore të gatshme të marrë hapat e nevojshëm për zgjedhje të lira dhe hapjen e negociatave me BE-në, vendosi unanimisht djegien e mandateve parlamentare të Partisë Demokratike në Kuvendin e dalë nga votat e krimit dhe mafias nga zgjedhjet e vitit 2017. Grupi parlamentar mandaton kryetarin e partisë për hapat e mëtejshëm”, tha Lulzim Basha.
Pritet që kryetari i Partisë Demokratike të mbledhë Këshillin Kombëtar për vendimin final dhe gjithashtu është ngritur një grup pune për teknikalitetet e dorëzimit të mandateve.
Deri në orën 13:00, përveç disa reagimeve të deputetëve në Facebook, nuk kemi ende një reagim zyrtar nga Lëvizja Socialiste për Integrim nëse do t’i bashkohet vendimit të demokratëve.
