Kreu i Partisë Demokratike, Lulzim Basha, ishte sot në Vorë ku ka zhvilluar takime me biznesin e vogël.
Me një video live në facebook, Basha tha se kriza ekonomike në vend ka vetëm një burim “abuzimin me pushtetin”.
Sipas kryeopozitarit, Rama, Ahmetaj dhe Veliaj ditën e djeshme i kanë dhënë Klodian Mërtirit, i cili është bashkëpronar i inceneratorit të Tiranës në landfillin e Sharrës, por njëkohësisht në kërkim ndërkombëtar nga Zimbabveja për skandalin me tenderin 60 milionë dollarë, një pagesë prej gjysmë milionë eurosh.
“Ditë tipike për të treguar realitetin, mes Shqipërisë reale dhe prioriteteve të kësaj qeverie në ikje. Ditën e djeshme Edi Rama, Arben Ahmetaj dhe Erion Veliaj, bashkëpronarët e inceneratorëve të Sharrës, landfillit të Sharrës, bashkë me bandën e Lushnjes dhe Klodian Mërtirin e famshëm, i paguan gjysëm milionë euro këtij të fundit pra dhe vetes së tyre, nga taksat tuaja, nga taksat e shqiptarëve.
Një orë më parë duhet të bashkohemi për t’i kthyer legjitimitetin vendit e për t’i kthyer taksat në ndihmë për ju, para se Ramavirusi dhe kriza që ai ka prodhuar ta gërryej këtë vend”, tha Basha./Opinion.al
