Kreu i Partisë Demokratike, Lulzim Basha i ka bërë një mesazh mirënjohjeje të gjithë mjekëve në Shqipëri.
Qytetet më të mëdha të Shqipërisë sot hyjnë në ditën e parë të masave të forta të kufizimit të lëvizjes, ndërsa Tirana dhe Durrësi janë pothuajse në gjendje shtet-rrethimi.
Në këtë moment kreu demokrat, i është drejtuar punonjësve të shëndetësisë me një mesazh ku thekson se ata janë “heronjtë tanë” dhe nënvizon se “e gjithë Shqipëria i sheh me admirim”.
“Të dashur mjekë, infermierë dhe punonjës të shëndetësisë kudo në Shqipëri dhe personeli i Spitalit Infektiv në Tiranë! Jeni heronjtë tanë! Mendja dhe zemra e çdo shqiptari është me ju! Zoti ju dhëntë forcë dhe kurajo për ta përballuar këtë sfidë që kemi përpara! Në këto kohë ju nuk jeni vetëm prindër, bashkëshortë, bijë e bija, motra dhe vëllezër të familjarëve tuaj, por të të gjithëve ne bashkqytetarëve tuaj. Mirënjohje të thellë kombëtare për secilin prej jush! Askush nuk ju sheh çuditshëm, e gjithë Shqipëria ju sheh me admirim për punën dhe përkushtimin tuaj! Zoti ju bekoftë ju dhe të afërmit tuaj! Zoti e bekoftë Shqipërinë!”, shkruan Basha.
Pas kreut të selisë blu, një mesazh falenderues për stafet mjekësore ka patur edhe Presidenti Meta.
Ai vlerëson sakreficën e tyre në vijën e parë të përballjes me pandeminë dhe i cilëson ata heronj të kësaj beteje.
“Mjekët, infermierët, sanitarët dhe personeli mbështetës janë sot në vijën e parë të përballjes me pandeminë COVID-19. Mirënjohje të thellë dhe falenderim për përkushtimin, profesionalizmin dhe sakrificat, edhe të familjeve të tyre. Ju jeni heronjtë tanë në këtë betejë për mbrojtjen e shëndetit të çdo qytetari të vendit! Krenarë për të gjithë ju!”, shkruan Meta. /Opinion.al
