Kreu i PD, Lulzim Basha ka publikuar një raport të agjencisë ndërkombëtare Fitch sipas të cilës, Shqipëria gjatë vitit 2019 është bërë vend më i rrezikshëm për të investuar.
Në raportin e Fitch shkruhet se si pasojë e përshkallëzimit të tensioneve politike, bojkotit të zgjedhjeve lokale nga opozita dhe mos hapjes së negociatave me BE-në, Shqipëria ka humbur 6.3 pikë në indeksin e saj të sigurisë të investimeve.
Basha thekson se gjendja nuk ka pse të jetë e tillë pasi sipas tij vendi ka burimet e duhura për të ecur përpara por ato duhen vënë në përdorim nëpërmjet politikave serioze.
“Sipas agjensisë prestigjioze ndërkombëtare Fitch, në vitin 2019 Shqipëria është bërë një vend edhe më i rrezikshëm për të investuar. Shanset tona për të tërhequr investime, të cilat i kemi shumë të nevojshme, po zvogëlohen përditë. Ndërkohë, komuniteti ndërkombëtar është lodhur nga dështimet e kësaj qeverie.
Por nuk ka pse të jetë kështu. Vendi ynë ka njerëzit dhe burimet e duhura për të ecur përpara. Ajo që na duhet, janë politika serioze dhe të mirëstudiuara që do ta ndalin krizën dhe do t’i japin vendit platformën që i nevojitet për të pasur sukses.”,shkruan Basha. /Opinion.al
