Lulzim Basha nga selia e Partisë Demokratike, pas një takimi me aleatët, pyeti kryeministrin Edi Rama se çfarë përmban dosja 184, pas asaj 339 ku sipas kryedemokratit tregon fytyrën e vërtetë të kësaj qeverie.
“Opozita e bashkuar dhe qytetarët do të vazhdojnë aksionin e përbashkët kundër këtij Parlamenti ilegjitim, kundër kësaj qeverie ilegjitime, e cila është kapur në flagrancë duke bashkëpunuar me krimin e organizuar siç tregon dosja “339”. Edi Rama, dosja “339” është makthi yt. Ti e di fare mirë se përtej minutave që janë botuar nga Zëri i Amerikës dhe Birn çfarë përmban ajo dosje, uroj ta dish se çfarë përmban edhe dosja “184”. Të dyja këto dosje do të zbardhen. Drejtësisë do t’i zgjidhen duart. Të gjithë politikanët e përfshirë me kokat e krimit të organizuar do të shkojnë para drejtësisë dhe shqiptarët do të kenë zgjedhje të lira dhe të ndershme“, tha Basha.
Ai ka dënuar dhe vendimin, siç e cilësoi, për rrethimin e parlamentit nga ushtarë.
“Duan t’i mohojnë qytetarëve të drejtën për të protestuar. Opozita do vazhdojë të protestojë kundër këtij parlamenti ilegjitim”, tha Basha, duke theksuar se klonimet e dështuara, që Rama do shesë nesër si fasadë opozitë nuk do të njihen nga opozita./ Opinion.al
