Atë që kryeministri Edi Rama e konsideron si aksioni anti-informalitet, kreu i opozitës e cilëson si një rast flagrant korruptimi. Lulzim Basha këtë të premte foli për një aferë mafioze miliona euro të faturimit elektronik të bizneseve. Sipas tij kasat e reja do t’i kushtojnë çdo biznesi 250 euro
“Rasti më i fundit i kapjes së shtetit është kontrata për faturimin elektronik të bizneseve. Është një projekt nga i cili Edi Rama dhe klientët e tij kanë planifikuar të vjedhin nga bizneset me qindra miliona euro në vitet e ardhshme. EdI Rama bëri një ligj për të krijuar një sistem të ri, i cili i detyron bizneset të blejnë kasa të reja dhe programe të reja kompjuterike. Këto do të shiten nga klientët e tij. Aktualisht janë 140 mijë kasa në përdorim, secila duet të zëvendësohet më një kompjuter Ipad dhe program të ri që do të kushtojnë të paktën 250 euro hardware, që do të thotë mbi 30 milionë euro nga bizneset dhe 50-100 euro në vit programi kompjuterik dhe mirëmbajtja që i bie deri 14 milionë euro çdo vit. Në 10 vjet bëhet fjalë për deri 170 milionë euro që do të përfitohen nga Edi Rama dhe klientët e tij: do zhvaten bizneset që të vjedhë Edi Rama”, tha Basha.
Kreu i PD-së foli dhe për një takim të Ramës me biznesmenët kroatë, që sipas tij diskutuan sëbashku me dy kompani shqiptare para bërjes të tenderit në zyrën e tij.
Basha tha se pasi tenderi falco mbaroi, kompania shqiptare Jehona u shit për 250 mijë euro tek një biznesmen i hetuar për pastrim parash në Kroaci./ Opinion.al
