Për kryetarin e Partisë Demokratike Lulzim Basha, krijimi i Byrosë Kombëtare të Hetimit duhet të futet në rendin e ditës së enjte në Parlament pasi për krijimin e saj kanë rënë dakort të gjithë, edhe PD, edhe Ilir Meta, përveç Edi Ramës.
“Byroja kombëtare e hetimit duhet të futet në rendin e ditës së enjte. Të gjithë kemi rënë dakort për të”, tha Basha nga mbledhja e grupit parlamentar të PD.
Basha kërkoi gjithashtu një procedurë të përshpejtuar për miratimin e krijimit të byrosë.
Për Bashën, askush më shumë se sa Edi Rama nuk i trembet drejtësisë.
“Nuk beson më askush kur bredh lart e poshtë në perëndim kur thua se opozita nuk e do reformën, se Ilir Meta nuk e do reformën.Ti lëmë llafet dhe të ulemi. T’i japim shqiptarëve një drejtësi të reformuar. Përndryshme përgjegjësia është e jotja dhe kupolës tëndë”, tha Basha.
