Kryetari i Partisë Demokratike, Lulzim Basha ka zhvilluar një bisedë telefonike me Anita Haradinajn, bashkëshorten e Ramush Haradinajt, i cili ndodhet i arrestuar në Francë për shkak të një urdhër-arresti ndërkombëtar lëshuar nga Serbia.
Basha i ofroi mbështetjen e tij bashkëshortes së Ramush Haradinajt për zgjidhjen e kësaj situate. Ai u bëri thirrje Qeverive të Shqipërisë dhe Kosovës që t’i kërkojnë Francës lirimin e ish-Kryeministrit të Kosovës dhe mos ta ekstradojnë për në Serbi.
Biseda telefonike e Lulzim Bashës me Anita Haradinajn:
Sonte në mbrëmje bisedova me Anita Haradinajn, bashkeshorten e Ramushit. I shpreha shqetësimin dhe revoltën time për këtë goditje tjetër të pabesë serbe ndaj heroit të Kosovës dhe mbështetjen time të plotë personale dhe politike. Jam i bindur se sot të gjithë shqiptarët janë me Ramush Haradinajn, pavarësisht bindjeve politike dhe përkatësive partiake.
Anita më tha se Ramushi është plot kurajo, dhe mbi të gjitha me besim se asgjë nuk mund të frenojë përparimin e Kosovës.
I bëj thirrje qeverive të Kosovës dhe të Shqipërisë t’i kërkojnë Francës lirimin e menjëhershëm dhe pa kushte të Ramush Haradinajt, dhe të ndërpresin çdo lloj angazhimi me Beogradin deri në tërheqjen e të gjitha urdhërarresteve ndërkombëtarë të Serbise ndaj pjesëtarëve të Ushtrisë Çlirimtare të Kosovës dhe qytetarëve të Kosovës që luftuan kundër regjimit vrasës të Milosheviçit.
Ndersa Rama duhet të kuptojë më në fund se dorezimi i tij para qeverisë serbe pa kushte dhe pa asnjë dobi për shqiptarët duhet të marrë fund.
