Në takimin me të rinjtë sot në Elbasan, kreu i opozitës, Lulzim Basha tha se plani i Partisë Demokratike për nxitjen e të rinjve që të punojnë në Shqipëri pas shkollimit përfshin pagesën e një viti stazh.
Qeveria e Edi Ramës e ka degraduar universitetin tha Basha duke nënvizuar se në Universitetin e Elbasanit janë mbyllur 12 degë.
“Në të gjitha degët pa përjashtim ne do të zbatojmë modelin gjerman. Studentët do të marrin një vit shtazh të paguar nga qeverisja jonë. Nuk duhet më të ndodhë që rinia mbaron universitetin dhe të qëndrojë rrugëve apo në stole nëpër lulishte. Është skandal që sot në Elbasan janë mbyllur 12 programe.
Janë 12 degë që janë mbyllur 6 rrezikojnë të mbyllen, për shkak se qeveria nuk mbështet studentët, por oligarkët dhe merret me koncesione. Paratë janë te koncesionet e jo te studentët. Rinia nuk duhet të largohet aq shumë, sepse kjo është një plagë që duhet të marrë fund”, tha Basha.
Ndër të tjera Basha deklaroi se ai parashikon që të mbështesë me bursa 100 euro cdo student me të ardhura të ulta dhe ata që kanë të ardhura mbi 640 mijë, do të ketë bursë 50 për qind të tarifës së universitetit.
Sipas kreut democrat qeverisja aktuale ka ngritur një sistem ku është promovuar krimi dhe droga dhe kjo ka sjellë shkatërrim të konkurencës të cilën ai premtoi se do të përpiqet ta rikthjë në vazhdën e prioritetit të tij kryesor për të ndalur emigrimin e të rinjve. /Opinion.al
