Akuza të drejtpërdrejta hodhi kreu i opozitës, Lulzim Basha ndaj kryeministrit Edi Rama pas publikimit të përgjimeve të reja nga BILD. Sipas tij, Edi Rama është timonieri i vjedhjes së zgjedhjeve.
“Në Shqipëri janë vjedhur të gjitha zgjedhjet që ka zhvilluar Edi Rama. Ky është përfundimi që del nga përgjimet e BILD dhe skandalet e tjera. Përgjimet na kanë dëshmuar skemën, përmasat dhe metodat. Kupola e Rilindjes në krye të PS-së nuk ka bërë asnjë dallim mes kriminelëve që ka përdorur. Ata kanë bashkëpunuar me trafikantë droge, qeniesh njerëzore, me vrasës, grabitës. Ata kanë blerë vota me para në dorë, kanë kërcënuar qytetarë për të votuar kandidatët e tyre, kanë ndëshkuar ata që nuk janë bindur. Çdo mjet i dhunshëm është përdorur pa asnjë kufizim. Ajo që dëshmojnë përgjimet e Bild është që aleanca ka përdorur administratën për vjedhjen e zgjedhjeve, nga drejtorët te punonjësit e thjeshtë”, tha Basha në një konferencë për mediat.
Basha tha se nuk do të ketë asnjë marrëveshje politike, nëse nuk dënohen ata që kanë vjedhur votat.
“Dua t’i them atij dhe të gjithë të tjerëve. Asgjë nuk do harrohet. Asgjë nuk do të tolerohet. Çdo krim do të ndëshkohet. Rruga drejt normaliteti politik dhe shoqëror në Shqipëri kalon nga nxjerrja e të gjithë përgjegjësve para drejtësisë. Asnjë hap politik, asnjë zgjidhje politike në Shqipëri nuk do të bëhet pa patur në themel të saj ndëshkimin e të gjithë atyre që kanë vjedhur votat e shqiptarëve. Asnjë marrëveshje politike për daljen nga kriza nuk do mund të arrihet, nëse pika numër 1 e saj nuk është ndëshkimi i vjedhësve të votave”.
Gazeta gjermane BILD botoi të mërkurën edhe 10 përgjime të tjera telefonike të realizuara nga Prokuroria shqiptare nga Dosja 184/2016, lidhur me zgjedhjet vendore në Dibër, ku dëgjohen politikanë socialistë dhe ish-ministra të qeverisë Rama, që diskutojnë për rezultate maksimale të votimeve.
Në përgjimet dëgjohen ish ministri i brendshëm Saimir Tahiri, ish ministri i energjisë Damian Gjiknuri si dhe deputetë socialistë, që bisedojnë me policë, biznesmenë dhe persona të dyshuar për veprimtari të paligjshme në krahinën e Dibrës.
Ata urojnë njëri tjetrin për maksimalizimin e fitores së zgjedhjeve me presione dhe forma të ndryshme. Atyre u premtohet se do të promovohen në karrierë, sepse ndihmuan fuqishëm fitoren e thellë të PS-së.
Në përgjimet e publikuara dëgjohen edhe disa metoda të blerjes së votave në favor të PS-së, mbledhjes së kartave të identitetit dhe presioneve që u bëhen qytetarëve për të votuar familjarisht pro PS-së./ Opinion.al
