Kreu i opozitës, Lulzim Basha ka reaguar pas zgjedhjeve për Parlamentin Europian. Me anë të një statusi në rrjetin social Facebook, Basha shkroi se është i lumtur që familja politike EPP – European People’s Party është konfirmuar forca e parë në parlamentin dhe qeverisjen europiane.
Ndër të tjera Basha nënvizoi se forca e qytetarëve në demokraci është vota, prandaj beteja e shqiptarëve për votën e lirë është betejë jetike për vlerat europiane, për demokracinë perëndimore dhe për Shqipërinë si gjithë Europa, teksa shtoi se nuk do bëhej asnjë hap pas.
Statusi i plotë:
Qytetarët europianë, me pjesmarrjen më masive të 20 viteve të fundit në zgjedhjet për Parlamentin Europian, konfirmuan vendosmërinë për të mbrojtur dhe çuar përpara vlerat europiane.
Jam i lumtur që familja jonë politike EPP – European People’s Party është konfirmuar forca e parë në parlamentin dhe qeverisjen europiane. Urimet më të përzemërta për presidentin Joseph Daul dhe PPE dhe në veçanti për fushatën e jashtëzakonshme të kandidatit tonë për President të Komisionit Europian Manfred Weber.
Forca e qytetarëve në demokraci është vota, prandaj beteja e shqiptarëve për votën e lirë është betejë jetike për vlerat europiane, për demokracinë perëndimore dhe për Shqipërinë si gjithë Europa. Asnjë hap pas! #ShqipëriaSiEuropa #2qershor
