Për kryetarin e opozitës, Lulzim Basha, 30 qershori ishte protesta më e madhe dhe domethënëse që qytetarët ndërmorën kundër Edi Ramës.
Në një fjalim të mbajtur nga takimi me struktura të PD në Urën Vajgurore dhe Kuçovë, Basha theksoi se braktisja e 30 qershorit ishte e paprecedentë në 3 dekadat e fundit.
Ai përsëriti edhe njëherë tri arsyet kryesore të këtij refuzimi. Mos përfaqësimi i interesave të qytetarëve, përfshi edhe socialistët, gjendja e rënduar ekonomike dhe aksioni opozitar janë sipas kreut të demokratëve arsyet që çuan në pjesëmarrjen e ulët në votimet e 30 qershorit
“E vetmja votë e pastër e 30 qershorit është vota e atyre që nuk dolën. Mesazhi është ai që është bërë refren deri edhe për fëmijët: Rama ik” tha ndër të tjera Basha në fjalën e tij.
Ai shtoi se raporti i ODIHR ishte “vula më e zezë që kanë marrë ndonjëherë zgjedhjet në Shqipëri dhe Ballkan” dhe se zgjedhjet e 30 qershorit nuk mund të prodhojnë asnjë pasojë juridike. Kështu Basha la të kuptohet se nuk i njeh kandidatët e dalë fitues nga këto zgjedhje. Madje ai shtoi se kryeministri, anëtarë të KQZ dhe personat e angazhuar në procesin e 30 qershorit duhen hetuar për shpërdorim detyre dhe fondesh publike. /Opinion.al
