Këshilli i Bashkëpunimit Rajonal (RCC) ka prezantuar sot në Tiranë edicionin e 10-të të Ballkan Barometrit, sondazhin më të madh të opinionit publik dhe të biznesit në rajon.
Aktiviteti u hap nga Sekretarja e Përgjithshme e RCC-së, Majlinda Bregu dhe Shefi i Delegacionit të Bashkimit Evropian në Shqipëri, Silvio Gonzato.
Gjatë fjalës së saj, Bregu tha se Ballkan Barometri ka zbuluar se rritja e çmimeve janë shqetësimi më i madh për këtë vit.
“Ballkan Barometri zbulon se rritja e çmimeve dhe inflacioni janë shqetësimi më i madh këtë vit për njerëzit e Ballkanit Perëndimor, të cilët për dekadën e fundit shqetësoheshin më shumë për situatën ekonomike dhe për papunësinë. Ky ndryshim nuk vjen si surprizë, duke pasur parasysh se inflacioni në Ballkanin Perëndimor është gati dyfishi i atij të BE-së (8,1% në 3,4% respektivisht), ndërsa çmimet e ushqimeve janë pothuajse të njëjta si në BE. Megjithatë, GDP-ja jonë është vetëm gjysma e asaj të BE-së”, tha Sekretarja e Përgjithshme e RCC-së, Majlinda Bregu.
Ajo tha ndër të tjera se besimi në bashkëpunimin rajonal është rritur.
“Me një notë pozitive, besimi në bashkëpunimin rajonal po rritet. Këtë vit, në rekord 82% e qytetarëve shprehën mbështetjen e tyre për të – rezultati më i lartë që nga fillimi i Ballkan Barometrit në 2015. Kjo tregon se bashkëpunimi rajonal është i rëndësishëm. Megjithatë, politika nacionaliste vazhdon të shihet si një pengesë e madhe për bashkëpunimin rajonal, megjithëse besimi dhe optimizmi në rajon mbeten të kujdesshëm si i perceptojnë njerëzit këto çështje, pasi opinioni publik evoluon aq shpejt sa e lejon guximi politik”, përfundoi Bregu.
