Një bari në zonën e Palasës i ka shpëtuar për mrekulli dhunës barbare të Jorgo Zanit, 30 vjeçarit që masakroi me hanxhar kushëririn e tij të mitur.
Pilo Gjikola ra pre e dhunës së bashkëfshatarit të tij, por fatmirësisht arriti t’i shpëtonte sulmit me sëpatë. Ai njoftoi policinë, por kjo e fundit nuk arriti dot ta kapte për momentin, e më tej nuk e vlerësoi më situatën dhe rrezikshmërinë që mund të paraqiste personi.
Ngjarja ndodhi rreth një vit më parë dhe që atëherë bariu i shmangej bashkëfshatarit të tij, duke e vlerësuar rrezikshmërinë që ai mund të paraqiste. Në fshat të gjithë e dinin se Jorgo ishte përdorues droge dhe se në momente të caktuara humbiste kontrollin dhe sjellja e tij mund të përbënte rrezik për ta.
Bariu Pilo Gjikola e kishte provuar vetë rrezikun e fqinjit, ndaj i ruhej. Ai u shpreh dje për mediat se i riu jetonte i vetëm pasi u kthye nga Greqia, vend në të cilin jetonte më parë me prindërit e tij. Ai hedh alarmin edhe për një fëmijë tjetër, i cili është zhdukur prej rreth 3 ditësh dhe askush nuk ka dijeni për të.
Ndonëse i mituri 9 vjeç është larguar edhe herë të tjera nga banesa dhe është kthyer, këtë herë banorët kanë dyshime të forta edhe për të miturin K. Konomi, i cili nuk po duket gjëkundi.
Ju jeni bari i zonës dhe nga banorët këtu mësuam se rreth një vit më parë keni rënë pre e dhunës së Jorgo Zanit. Si ka ndodhur ngjarja dhe a e denoncuat ju në polici dhunuesin?
Po, është e vërtetë. Para një viti ai më rrahu me bishtin e sëpatës. U përleshëm. O do më vriste, o do e vrisja, por fatmirësisht arrita t’i shpëtoja sulmit me sëpatë. Mora policinë menjëherë dhe i thashë që kapeni se ndryshe do ta vras. Por ai u arratis, nuk e kapën dot. Më pas nuk erdhi njeri që ta ndalonte.
A patët më kontakte me të pas ngjarjes?
Që në momentin që më goditi me sëpatë, unë u shmanga. Por fati i keq, sot (dje) që u gjet djali pa kokë.
Me kë shoqërohej Jorgo këtu në fshat?
Rrinte shumë me një fëmijë 9 vjeç. Por edhe ky ka rreth tri ditë i zhdukur. Mesa di unë po kërkohet nga policia dhe nuk dihet asgjë për të. Madje, duke qëndruar veç me Jorgon, fëmija vetëm 9 vjeç u bë problematik dhe filloi të vidhte.
Me kë jetonte Jorgo?
Familjen e ka në Greqi… Jetonte i vetëm. Prindërit ai i ka në Greqi. Edhe vetë Jorgo ka jetuar në Greqi, nuk e di pse është kthyer para nja dy apo tre vitesh. Sa budallallëqe ka bërë në fshat, të gjithë e dimë. Therte edhe kafshë dhe i hante. Ishte i tmerrshëm. Thuhet se Andrean e përzuri dhe pastaj e ndoqi në rrugicë afër shtëpisë, 150 metra larg dhe aty e ka masakruar. Në atë banesë ku ai jeton i vetëm e gjetën bashkë me kokën e djalit në dorë… Është e tmerrshme kjo që ka ndodhur. Fati i keq i fëmijës që erdhi te gjyshërit, por ja çfarë ndodhi.
