Pasi Sekretari i Përgjithshëm i Partisë Demokratike, Gazmend Bardhi deklaroi se disa kolegë të tij janë shoqëruar nga policia, ka ardhur edhe reagimi i këtyre të fundit.
Sipas Policisë së Shtetit në selinë e PD janë pyetur vetëm deputetët demokrat, ndërsa personat e tjerë që kanë qenë brenda selisë janë shoqëruar për t’u marrë në pyetje.
Kujtojmë se Bardhi pati një debat më efektivët e Policisë së Shtetit, duke iu kërkuar këtyre të fundit llogari rreth shoqërimit të disave prej demokratëve që kanë qenë të pranishëm sot në selinë e PD.
“Me keqardhje dëgjuam deklaratat e Sekretarit të Përgjithshëm të Partisë Demokratike, z. Gazment Bardhi, në lidhje me punën hetimore të Policisë që po kryhet për dokumentimin e shkatërrimit të pronës dhe akteve të dhunës të ndodhura gjatë protestës së sotme në selinë e Partisë Demokratike.
Sqarojmë opinionin publik se në vijim të veprimeve procedurale të kryera nën drejtimin e Prokurorisë së Rrethit Gjyqësor Tiranë, në selinë e Partisë Demokratike janë pyetur vetëm deputetët e Partisë Demokratike, ndërsa personat e tjerë që janë konstatuar brenda selisë janë shoqëruar në ambientet e Policisë se Shtetit, për t’u marrë në pyetje.
Policia e Shtetit do të vijojë me profesionalizëm dhe vendosmëri, veprimet ligjore, për të dokumentuar të gjitha veprimet e kundërligjshme gjatë protestës së sotme dhe për të vënë para përgjegjësisë ligjore të gjithë personat përgjegjës.
Njëkohësisht, Policia e Shtetit garanton qytetarët se shërbimet e Policisë janë në terren dhe janë të angazhuara maksimalisht për të garantuar rendin dhe sigurinë”-njofton Policia e Shtetit./Opinion.al
