Policia nuk ka lejuar gazetarët që të hyjnë brenda ambienteve të selisës së PD. Sipas autoriteteve ndërtesa është skenë krimi dhe tashmë po mblidhen provat në vendngjarje.
Lulzim Basha njoftoi se do të priste në zyrën e tij mediat, më herët.
Ndërkohë, ka qenë Sekretari i Përgjithshëm i PD-së, Gazmend Bardhi ai që shkoi te dera hyrëse e PD-së dhe i kërkoi policisë që të lejonte hyrjen e gazetarëve.
Bardhi ka kërkuar nga efektivët që të lejojnë kamerat dhe gazetarët, por policia ka deklaruar se hyrja e medias do të lejohet pas disa minutash pasi të jetë bërë fotografimi i vendngjarjes.
“Ju lutem përfaqësuesve të policisë të më hapin rrugën të fus mediat në selinë qendrore të partisë. Edi Rama nuk i fsheh dot gjurmët e krimit të Sali Berishës në godinën e demokratëve. Nuk ka polici shteti që mund të fshehë me urdhër të Edi Ramës krimin që ka bërë sot Sali Berisha në selinë qendrore të Partisë Demokratike. 37 deputetë të grupit parlamentar të PD, do japin deklaratë për mediat në zyrën e tyre. Nuk i pengoni dot. Media të bëjnë transparencë për krimet që ka kryer sot Sali Berisha në godinën e demokratëve. Ju lutem hapni rrugën të futen përfaqësuesit e medias. Nuk marr urdhër nga prokurorja unë për të futur median në zyrën time. Hapni rrugën për përfaqësuesit e medias që të shikojnë krimin e paprecedentë që ka kryer Sali Berisha në godinën e demokratëve duke rrezikuar jetën e mijëra demokratëve që ishin brenda selisë qendrore të PD. a ka mundësi që mediat të filmojnë krimin që ka kryer Sali Berisha sot?”, tha Bardhi.
