Ndërsa Partia Demokratike ka akuzuar Ministrinë e Shëndetësisë për abuzime me tenderat e zhvilluar gjatë situatës së pandemisë dhe kjo e fundit është shprehur e hapur për hetim, Sekretari i Përgjithshëm i PD Gazmend Bardhi, deklaron rezerva në mënyrën se si hetimi po kryhet.
I pyetur në studion e “Opinion”, lidhur me mënyrën se si ka reaguar SPAK në çështjen e tenderave të Ministrisë së Shëndetësisë, Bardhi tha se SPAK i ka lënë 3 javë kohë këtij institucioni, duke krijuar mundësinë për prishje provash.
“Nuk ka ndodhur asnjëherë ku të ketë një akuzë për korrupsion apo shpërdorim detyre që SPAK- u të ketë njoftuar ministrinë dhe të presi 3 javë që ministria të çojë dokumentat. Sepse nëse ka një hetim, i cili përfshin veprimin e shpejtë ne institucionin e drejtësisë është ai për shpërdorim detyre. Sepse nëse zyrtari që ka abuzuar me detyrën është akoma në zyrën e tij dhe ti i thua më sill dokumentat dhe i lë atij 3 javë kohë, sigurisht që ndodh ajo që ndodhi, i vihet zjarri dokuementave dhe mund të prishet prova. Ne kemi denoncuar në 18 Prill, SPAK-u ka njoftuar ministrinë t’i sjellë dokumentacionin në datën 22 Prill. Ministria ka dorëzuar dokumentacionin në datën 8 Maj. Tani shikojeni vetë hapësirën që i është lënë Ministrisë së Shëndetësisë për këtë operacion./Opinion.al
