Deputeti i Partisë Demokratike, Gazmend Bardhi, ka deklaruar këtë të martë në Komisionin e Ligjeve që Shqipëria është e parafundit në rajon sa i takon vaksinimit.
“Jemi të parafundit për vaksinimin, kemi lënë mbrapa vetëm Bosnje-Hercegovinën, dëgjova zonjën ministre që na tha, ndoshta situata ndryshon në 30 tetor.
Jam i sigurt që në 30 tetor do ju thërrasim prapë dhe t’ju pyesim në varësi të situatës dhe të shifrave, por fakti është që në këtë moment që ne flasim, ndryshe nga situata që na paraqitet si ishim 4 apo 5 muajsh kur ju e përdorët procesin e vaksinimit për fushatë elektorale”, tha Bardhi.
Më tej Bardhi deklaroi se ky komision duhet t’i kërkojë llogari ministres për çështje serioze gjatë trajtimit të pandemisë. Sipas Bardhit, Shqipëria është vendi i vetëm bashkë me Zimbabve-në ku Ministria e Shëndetësisë është nën hetim nga prokuroria për përdorim të tenderave sekretë dhe vjedhje të fondeve publike.
“Në fakt do të duhej që ky komision t’i kërkonte llogari ministres për çështje shumë serioze gjatë trajtimit të pandemisë. Ju e dini që ne jemi vendi i vetëm bashkë me Zimbabve-në ku Ministria e Shëndetësisë është nën hetim nga prokuroria për përdorim të tenderave sekretë dhe vjedhje të fondeve publike gjatë pandemisë.
Ndoshta edhe zonjat që janë të ulura aty si përfaqësuese të qeverisë janë sot nën hetim nga Prokuroria sepse kanë keqpërdorur fondet publike gjatë pandemisë. Është Shqipëria dhe Zimbabve ku është arrestuar Ministri i Shëndetësisë.
Ka një hetim të përfunduar nga SPAK që i ka kaluar për kompetencë, pra ka konstatuar shkelje e Ministrisë suaj me fondet publike, abuzime me tendera sekretë, dhe ia ka kaluar për kompetencë Prokurorisë së Tiranës dhe zyrtarët e Ministrisë së Shëndetësisë janë në hetim për keqpërdorim të fondeve publike. Ju jeni bashkë me Ministrinë e Shëndetësisë në Zimbave, dy ministritë në botë që jeni nën hetim për keqpërdorim të fondeve të qytetarëve shqiptarë gjatë pandemisë. Prandaj t’i lëmë falënderimet e rreme, secili të bëjë detyrën”, tha Bardhi./Opinion.al
