Retorika të polarizuara shoqërojnë zhvillimet në PD, një ditë pas protestës së 8 Janarit.
Ndërsa më herët përmes në postimi në Facebook, lideri historik tregonte një foto në të cilën lihej të kuptonte që zyrat ishin dëmtuar nga brenda, përmes një reagimi po ashtu në rrjetin social, Gazment Bardhi i përgjigjet.
Ky i fundit e akuzon Berishën për manipulim të demokratëve, ndërsa shprehet se zyra e Sekretarit të Përgjithshëm është sulmuar me gurë nga jashtë.
“Shumë prej ne demokratëve dhe qytetarë të tjerë që presin nga PD të sjellë diçka të mirë për vendin, dje kanë mbetur shumë të trishtuar. Shumë prej demokratëve e kanë ndier veten të tradhëtuar, sepse mund të kenë besuar vërtet tek Sali Berisha. Për të gjithë demokratët kam një mesazh: shikoni këtë video dhe mos i besoni Sali Berishës! Si kjo gënjeshtër, ka gjithçka thotë dhe bën.
Ajo që bën është vetëm manipulimi me dëshpërimin tuaj, me hatërmbetjet dhe mosbesimin tuaj për një mijë arsye! Në video duket qartë se zyra e Sekretarit të Përgjithshëm është sulmuar me gurë nga jashtë, por Sali Berisha thotë se është inskenim i Bashës nga brenda! Këtë ka bërë që pej 9 shtatorit! Mashtron dhe manipulon demokratët me qëllimin e vetëm për të shndërruar PD në një strehim politik për vete dhe familjen e tij.
Sa herë të dëgjoni Sali Berishën sillni ndërmend këtë video! Këtu shfaqet në pak sekonda historia e një ish burri shteti të zvogëluar në një burracak që hedh gurin dhe fsheh dorën”, shprehet Bardhi./Opinion.al
